MosJan Posted September 13, 2005 Report Share Posted September 13, 2005 ԵՐԵՎԱՆԻ ՕՐԸ ԿՆՇՎԻ ՀՈԿՏԵՄԲԵՐԻ 8-ԻՆ ԵՎ 9-ԻՆ Իսկ սգո պարագաների վաճառքը կկանոնակարգվի օրենքով Քաղաքապետարանում երեկ հրավիրված ամենշաբաթյա մամուլի ասուլիսի ժամանակ փոխքաղաքապետ Արման Սահակյանը տեղեկացրեց, որ կառավարության որոշմամբ յուրաքանչյուր հոկտեմբեր ամսվա երկրորդ շաբաթ օրը կնշվի Երեւանի օրը: Այս տարի տոնական միջոցառումները կանցկացվեն հոկտեմբերի 8-ին եւ 9-ին: Ակնկալվում է մեծ թվով հյուրերի առկայություն: Արդեն հայտնի է միջոցառումների գլխավոր ռեժիսորը: Դա Վիգեն Ստեփանյանն է: Տոնակատարությունները կսկսվեն հոկտեմբերի 8-ին: Այդ օրը օպերայի եւ բալետի պետական թատրոնում տեղի կունենա հանդիսավոր նիստ, իսկ դրա ավարտից հետո համերգ Ազատության հրապարակում: Համերգներ եւ տոնական միջոցառումներ տեղի կունենան մայրաքաղաքի բոլոր համայնքներում: Փոխքաղաքապետը հայտնեց նաեւ, որ տոնակատարությունը կեզրափակվի աննախադեպ հրավառությամբ: Մշակույթի ոլորտի մյուս նորությունն այն էր, որ քաղաքապետարանը 14 մլն դրամ է հատկացրել երաժշտական դպրոցներում սովորող միակողմանի եւ երկկողմանի ծնողազուրկ, զոհված, հաշմանդամ ազատամարտիկների եւ գերազանցությամբ սովորող երեխաների ուսուցման ծախսերը վճարելու համար: Այսինքն, այդ երեխաներն ամբողջությամբ կազատվեն ուսման վճարից: Արման Սահակյանը ընդգծեց, որ հատկապես կարեւորվելու են ժողգործիքների գծով սովորողները, քանի որ նրանց թիվը վերջին տարիներին նվազել է: Առեւտրի եւ սպասարկումների ոլորտից Արման Սահակյանը ներկայացրեց շինանյութերի վաճառքի օբյեկտներում ստեղծված վիճակը: Նա նշեց, որ մայրաքաղաքում հաշվառված են նման 256 օբյեկտներ, որոնք իրենց ապրանքների վաճառքը իրականացնում են մայթերի վրա, երբեմն նաեւ մեքենաների երթեւեկելի մասում եւ անգամ զավթած հողատարածքներում: Անմիջապես տնից վաճառք իրականացնող սուբյեկտները 65-ն են: Ըստ Արման Սահակյանի, այդ բոլոր խախտումների համար տնտեսվարողները զգուշացվել են, եւ հավանաբար հետագայում կկիրառվեն ավելի խիստ միջոցառումներ: Սակայն հասկանալի չեղավ, թե կոնկրետ ինչ միջոցառումներ կարող է կիրառել քաղաքապետարանը, երբ որոշ ժամանակ անց հենց փոխքաղաքապետը նշեց, որ իրենք օրենսդրական լծակներ չունեն կարգազանցներին պատժելու համար: Նույնը կարելի է ասել նաեւ փողոցային առեւտրի կապակցությամբ, որտեղ, Արման Սահակյանի հավաստմամբ, խնդրի վերջնական կարգավորման համար տարիներ կպահանջվեն: Այս դեպքում նա կարեւորեց փողոցային առեւտրից չօգտվելու հանգամանքը, ասելով, որ այն կարծիքը, թե փողոցում վաճառվող ապրանքներն ավելի էժան են, չի համապատասխանում իրականությանը: Նրա հավաստմամբ, փողոցում եւ շուկայում վաճառվող ապրանքների գները չեն տարբերվում միմյանցից: Ռեստորաններից եւ սրճարաններից լսվող բարձր երաժշտության վերաբերյալ բողոքներ գրեթե չեն եղել, հայտնեց փոխքաղաքապետը եւ ասաց, որ եւս մեկ ժամով երկարացվել է գիշերային ժամերին աղմուկը թույլատրված սահմանները չգերազանցելու ժամանակը: Այն այժմ տեւում է գիշերվա ժամը 23-ից մինչեւ առավոտյան 8-ը: Սգո պարագաների վաճառքի մասին երեկվա բանախոսը չցանկացավ երկար խոսել, ասելով, որ շուտով խորհրդարանի քառօրյա նիստերի քննարկմանը կդրվի «Հուղարկավորության մասին» օրենքի նախագիծը, որտեղ կկարգավորվեն այդ հարցերը: Արման Սահակյանը միայն տեղեկացրեց, որ համաձայն օրենքի, մասնավորապես դագաղները պետք է վաճառվեն գերեզմանոցների մոտ գտնվող հատուկ առանձնացված տարածքներում: ԱՐԱ ՄԱՐՏԻՐՈՍՅԱՆ Quote Link to comment Share on other sites More sharing options...
Recommended Posts
Join the conversation
You can post now and register later. If you have an account, sign in now to post with your account.